Poème choisi de façon aléatoire dans notre fonds à chaque visite de cette page.
Ravissant fleuve, et de pierreuse veine,
Qui de ronger les rives ton nom prens,
Bien descendons par désirs differens
Ou amour moy, et toy nature meine.
Or va premier, et ton cours ne refreine :
Va je t’en prie, et à la mer ne rens
Si tost son droict : mais un peu te reprens
Quand tu seras vers celle part sereine :
Ou pourra veoir ce beau soleil luisant,
Qui reverdit ton bort gauche, et peut estre,
Que mon tarder luy est bien desplaisant.
Ses piedz luy baise et sa blanche main dextre,
En luy disant : baiser soit pour parolle,
L’esprit est prompt, mais la chair foible et molle.