Poème choisi de façon aléatoire dans notre fonds à chaque visite de cette page.
Desja luisoit nostre estoille amoureuse
Par l’orient, et l’autre coustumiere
Rendre Juno jalouse, avoit pleniere
Clarté, venant de part septentrionneuse.
Levee estoit pour filler la soigneuse
Vieille, ebifée, ayant faict de lumiere
Et aux amans, qui sont dans la tanniere
Avec leur dame, estoit l’heure fascheuse.
Lors que m’amours de son mal presqu’estaincte
Vint à mon cueur, non par visive voye,
Mais en esprit pour consoler ma plaincte.
O qu’autres fois souvent veüe l’avoye
Bien autre qu’ore ! et sembloit de me dire :
Prens cueur, amy, qu’encores je respire.